Шупашкарта авӑн уйӑхӗнче троллейбуссенче СПБ урлӑ тӳлесен билет хакӗ 8 тенкӗ йӳнӗрех пулнӑ. Ку акцие ҫулталӑк вӗҫӗччен тӑсма йышӑннӑ. Ку мелпе Шупашкарта тата Ҫӗнӗ Шупашкарта тӳлеме пулать. Акци раштав уйӑхӗн 31-мӗшӗччен тӑсӑлӗ.
Ҫапла майпа Шупашкарти троллейбуссенче тата Ҫӗнӗ Шупашкара ҫӳрекен 62-мӗш троллейбусра билет хакӗ 21 тенкӗ пулӗ. Ҫӗнӗ Шупашкарти троллейбуссенче вара – 17 тенкӗ.
Ҫӗнӗ Шупашкартан Шупашкара ҫӳрекен 101С автобус халӗ «Университет» микрорайона таран ҫитет. Вӑл Вӑрман урамӗнче чарӑнать.
Унччен ҫак маршрутӑн юлашки чарӑнӑвӗ И.Н. Ульянов ячӗллӗ Чӑваш патшалӑх университечӗн ҫӗнӗ корпусӗ патӗнче пулнӑ. Сӑмах май, 101С автобус Ҫӗнӗ Шупашкарти Химтехнумран И.Н. Ульянов ячӗллӗ ЧПУ таран Мускав проспекчӗпе ҫитет.
Ҫӗнӗ Шупашкарта ҫуралса ӳснӗ режиссер Марат Никитин Юхма Мишшин «Несжатый сноп незасеянного поля» повеҫӗ тӑрӑх «Истори деда Азамбая» ятлӑ фильм ӳкернӗ. 62 минута тӑсӑлаканскер юпа уйӑхӗн 31-мӗшӗнче проката тухӗ.
Кинона кинозалсенче, ҫав шутра округсенче те, курма пулать. Билет 200 тенкӗ тӑрать, ӑна «Пушкин карттипе» те туянма май пур. Тӗп роле Чӑваш халӑх артисчӗ Василий Павлов вылянӑ. Сюжечӗпе кӗскен паллаштарар.
Тӑван ҫӗршывӑн Аслӑ вӑрҫи пӗтнӗренпе 4 ҫул иртнӗ. Ватӑ Азамбай пӗртен-пӗр ывӑлӗ Илепер вӑрҫӑра пуҫ хунине халӗ те ӗненмест. Унӑн шӑпине пӗлес тесе вӑл Мускава ҫыру та янӑ, хурав кӗҫ-вӗҫ ҫитмелле. Илепере савнийӗ Силимпи те кӗтет. Вӑл ӑна фронтран кӗтсе илме шантарнӑ-ҫке-ха. Сӑртлӑ вырӑнта Илепертен юлнӑ пӗртен-пӗр япала пур: вӑл лартнӑ йывӑҫ. Унпа юнашарах Силимпин йывӑҫӗ ешӗрет. Ывӑлне кашни кун кӗтекен Азамбай йывӑҫ патне кайса унпа сехечӗ-сехечӗпе калаҫать.
Пӗррехинче йывӑҫ патӗнчен таврӑнсан Азамбай чирлесе ӳкет. Ун чухне тӗлӗк курать: вӑл тупӑкра выртать пек, унпа юнашар тахҫанах вилнӗ аслашшӗ Акмарса утса ҫӳрет. «Санӑн ҫакӑ хуйхӑ-и? Пӗр ывӑл ҫеҫ вӑрҫӑран таврӑнман!
Ҫак сӑн ӳкерчӗкри пӗчӗк хӗр пӗрчи Назира Сангакова халӗ 23 ҫулта. Вӑл тӑван амӑшне шырать. Ашшӗ Назирӑна Таджикистана илсе кайнӑ. Хӗрача ун чухне пӗчӗк пулнӑ, ҫавӑнпа вӑл амӑшне астумасть те.
Назирӑн упӑшки Саша /Раҫҫейре ӑна ҫак ятпа чӗнеҫҫӗ/ интернетра Шупашкарта пурӑнакан Светлана Черновӑпа ҫыхӑннӑ. «Ашшӗ Назирӑна Раҫҫейрен 2001 е 2003 ҫулта илсе кайнӑ. Таджикистанра вӑл ачана хӑйӗн амӑшӗпе хӑварнӑ, хӑй кайран темиҫе хут та авланнӑ, Раҫҫейрех пурӑннӑ. Назира амӑшне вӑл Раҫҫейре юлнине пӗлнӗренпе шыраса тупма ӗмӗтленет. Ҫулсем иртнӗҫемӗн унӑн тунсӑхӗ ӳссе кӑна пырать. Вӑл ӑна питӗ курасшӑн.
Назирӑпа Саша халӗ Раҫҫейре Новосибирскра пурӑнаҫҫӗ. Саша манпа ҫыхӑнсан Назира амӑшне шырани пирки хамӑн страницӑра пост вырнаҫтартӑм. Ман пата унӑн амӑшӗ пекрех хӗрарӑмсен сӑн ӳкерчӗкӗсене ярса паркаларӗҫ. Анчах вӗсенчен пӗри те вӑл пулманни палӑрчӗ. Тӗнчере пӗр пек 7 ҫын пур теҫҫӗ вӗт. Назира сӑнӗпе амӑшӗ пекех. Унӑн пит ҫӑмарти ҫинче пысӑк тур палли пур. Ахӑртнех, амӑшӗ ҫакна астуса юлнӑ. Ҫак сӑн ӳкерчӗкре пӗчӗк Назира мӗнле тумпа - ахӑртнех, ашшӗ ӑна ҫавӑнпах илсе кайнӑ, ҫуркунне пулнӑ-тӑр.
Паян Ҫӗнӗ Шупашкарта пурӑнакансем комета вӗҫнине сӑн ӳкернӗ. С/2023 А3 ятлӑскер паян Ҫӗр чӑмӑрӗнчен чи ҫывӑхра вӗҫсе иртет, ҫавна май ӑна ятарлӑ аппаратсӑр, ахаль куҫпах, курма пулать.
Палӑртмалла: ҫак комета юлашки 25 ҫулта чи ҫутти пулнӑ. Кӗҫех комета курӑнми пулӗ, мӗншӗн тесен вӑл майӗпен ҫуттине ҫухатса пырӗ.
Ҫӗнӗ Шупашкарти 18-мӗш лицейра историпе обществознани предмечӗсене вӗрентекен Артем Максимов Чӑваш Ен чысне Раҫҫей шайӗнче иртекен «Ҫулталӑкри вӗрентекен» конкурсра хӳтӗлени пирки пӗлтернӗччӗ.
Вӑл конкурсра чи лайӑх 20 педагог йышне кӗреймен. «Хисеплӗ 21-мӗш вырӑна йышӑнтӑм», - ҫапла ҫырнӑ Артем Максимов «Контактра» халӑх тетелӗнчи страницинче. Вӑл ҫак конкурса хутшӑнса ҫӗршыври чылай вӗрентекенпе паллашнине, опыт пухнине палӑртнӑ.
Палӑртмалла: конкурс финалне 90 вӗрентекен хутшӑннӑ.
Ӗнер каҫхине Ҫӗнӗ Шупашкарта васкавлӑ медпулӑшу светофор симӗс ҫутнӑ вӑхӑтра пынӑ «Гранта» ҫине пырса кӗнӗ. Медпулӑшу машини ҫутнӑ сигналсемпе пынӑ. Икӗ транспорт та ҫаврӑнса ӳкнӗ.
Медпулӑшу машининче ача кӗтекен хӗрарӑм пулнӑ. Малтанлӑха пӗлтернӗ тӑрӑх, вӑл 18-та, ӑна Шупашкара илсе кайма тухнӑ. Ӑна пульницӑна илсе ҫитернӗ, унӑн сывлӑхӗ аванах. Фельдшерсене те медпулӑшу кирлӗ пулнӑ.
Шупашкара тепӗр 20 ҫӗнӗ троллейбус илсе килнӗ. ЧР Транспорт министерстви пӗлтернӗ тӑрӑх, чӳк уйӑхӗн вӗҫӗччен тата 52 троллейбус илсе килмелле.
Ку транспорта Дом.рф инфраструктура облигацийӗ пулӑшнипе туяннӑ. Сӑмах май, заем пулӑшнипе ку таранччен 92 троллейбус туяннв. Пирвайхи 20 транспортпа ҫалла кӳрсе килнӗ. Вӗсене Ҫӗнӗ Шупашкара панӑ ӗнтӗ. Ҫӗнӗ троллейбуссем 52, 53, 54 тата 55-мӗш маршрутсем ҫине тухнӑ.
Шупашкарти Калинин урамӗнчи складсенчен пӗринчен оргтехника вӑрланӑ. Пӑтӑрмах пирки йӗрке хуралҫисене пӗлтернӗ.
Вӑрӑ чӳрече кантӑкне ватса кӗнӗ иккен. Фирма 200 пин тенкӗлӗх шар курнӑ.
Пакунлисем вӑрӑ йӗрӗ ҫине часах тухнӑ. Вӑл ҫын Ҫӗнӗ Шупашкарти 38 ҫулти арҫын пулнӑ. Вӑрланӑ тавара вӑл Ҫӗрпӳ тӑрӑхӗнче пытарнӑ. Пытарса пӗтерейменнине ҫывӑхри пӗвене янӑ-мӗн.
Арҫын тӗлӗшпе пуҫиле ӗҫ пуҫарнӑ.
Ҫӗнӗ Шупашарта 8 ҫулти арҫын ача килте вылянӑ чухне ручкӑпа шӑлне чакаланӑ. Ӑнсӑртран вӑл ҫӗмӗрӗлсе кайнӑ, вӗҫӗ вара шӑлӗ ӑшӗнче юлнӑ.
Ача амӑшӗпе пӗрле стоматологи поликлиникине Алексей Аверьянов тухтӑр патне килнӗ. Пациента тӗрӗсленӗ, рентген тунӑ хыҫҫӑн пӗтӗмлетӳ тунӑ: шӑла кӑлармалла. Юрать-ха, вӑл сӗт шӑлӗ кӑна пулнӑ. Операци ӑнӑҫлӑ иртнӗ. Тухтӑрсем кайран тухмалли шӑл тымарне упраса хӑварнӑ.
+1.3 °C